Historiku

Reparti i parë i Maternitetit në Tiranë është inaguruar më 7 Maj 1937 pranë spitalit civil “Zogu I”. Ky repart merrte përsipër të realizonte edhe funksione të shërbimit për lindjet operative dhe ndërhyrjet kirurgjikale.

Ndërtimi i themeleve të “Shtëpisë së Nanës dhe Fëmis” (OMNI- Opera Nazionale di Maternita e Infanzia), ka filluar në fund të vitit 1938, nga firma italiane “Motta Scandurra” dhe u ndërtua në një kohë rekord për kohën.

Punimet përfunduan në fund të Nëntorit të vitit 1942.
Spitali Universitar Obstetrik – Gjinekologjik “Mbretëresha Geraldinë” ka funksionuar si shtëpi lindje që nga viti 1940, por vetëm në dt 28.11.1942 doli zyrtarisht urdhri nga Ministria e Financave e asaj kohe.

Universiteti i Tiranës filloi zyrtarisht aktivitetin në vitin 1952, ndërsa Fakulteti i Mjekësisë u përfshi në këtë strukturë pak më vonë. Në këtë periudhë spitali funksiononte si Strukturë Universitare për lëndën e Obstetrikë – Gjinekologjisë dhe u quajt Materniteti Nr.1.

Në dt. 08.12.2004 me urdhër nga Ministria e Shëndetësisë i vihet emri: Spitali Universitar Obstetrik Gjinekologjik “Mbretëresha Geraldinë”, emër që mban dhe sot.
Aktualisht Spitali Universitar Obstetrik – Gjinekologjik “Mbretëresha Geraldinë” është spital terciar, ku në bazë të një koordinimi drejtuar nga Ministria e Shëndetësisë referohen raste të ndërlikuara ardhur referuar nga spitalet rajonale dhe ato bashkiake.

1. SUOGJ është person juridik me zotësi të plotë për të vepruar.
2. SUOGJ është institucion publik në varësi të Ministrisë së Shëndetësisë.
3. SUOGJ e ushtron veprimtarinë e tij në përputhje me standardet e përcaktuara nga Ministria e Shëndetësisë, e cila ka të drejtë t’i rivlerësojë ato çdo vit.