Personeli në këtë shërbim është i përbërë si më poshtë:

• Mjekë obstetër-gjinekologë
• Mami
• Personel mbështetës

1. Njësia e pranim/urgjence. Në këtë njësi pranohen të gjithë pacientet që paraqiten për shtrim të planifikuar apo si raste urgjence. Kjo njësi funksionon 24/7 për të gjithë shtrimet që kryhen në SUOGJ.

Kjo njësi shërben si njësi për triazhimin e urgjencave duke i shpërndarë më pas shtrimet sipas shërbimit përkatës. Kjo njësi ka të përfshirë dhomën e pritjes së pacientes, dhomën e trajtimit ditor për pacientet që nuk kanë nevojë për shtrim, dhomën e ekzaminimit si dhe dhomën e mjekimit.

Për çdo paciente në repartin e trajtimit ditor, plotësohet dokumentacioni (kartela) sipas klinikës ku do të hospitalizohet pacientja ose dokumentohet në regjistër.

2. Pjesa më e rëndësishme e Shërbimit të Obstetrikës është Blloku i Lindjes dhe Operacionit ku realizohet vëllimi më i madh i punës, ku numri i lindjeve është 6500-7000 lindje në vit. Ky bllok përbëhet nga 4 salla lindjeje dhe 3 salla operacioni.

3. Klinika post lindje dhe nënave me fëmijë në reanimacion. Këtu pacientet transferohen dhe trajtohen nga 5-6 orë mbas lindjes deri në dalje nga spitali. Në këtë klinikë marrin shërbim gratë e lindura me lindje vaginale dhe ato me operacion.

Lehonat e lindura në mënyrë vaginale qendrojnë në spital jo më pak së 24 h nga lindja dhe lindjet me sectio cesarea jo më pak se 48 h nga lindja. Të porsalindurit qëndrojnë pranë nënës që nga momenti i lindjes deri në daljen nga spitali me përjashtim të rasteve kur lind nevoja për shërbim të specializuar transferohet në reanimacionin.